Bridgestone компанияси велосипед учун дамланмайдиган шина ишлаб чиқаради

Япониянинг Bridgestone компанияси қаттиқ пластмасса кегайлардан ҳавосиз шина тайёрлашга киришди. Компания хабарномасида янги маҳсулот 2019 йилда дунё юзини кўриши айтилган.

Олимлар қаттиқ кегайга маҳкамланган кенг полосани термопластик смола ёрдамида тайёрлади. Режага биноан эластик каркас зарбани ўзига олиб, велосипеднинг равон ҳаракатини таъминлаши лозим. Қолаверса, энди велосипедчилар насос олиб юришига ҳожат йўқ, янги шина тешилмайди.

Бу компаниянинг биринчи ихтироси эмаслигини айтиб ўтиш лозим. 2013 йилда Bridgestone биринчи ҳавосиз шинасини кўрсатган бўлиб, у автомобилга мўлжалланганди. Аммо кўп ўтмай янги шина тез ейилиб кетиши ва кўпи билан 60 км/соат тезликни таъминлаши аён бўлди. Bridgestone ўз технологиясини такомиллаштирди ва энди велосипедчиларга таклиф этмоқда.

Компания мазкур технологияни патентлаган, аммо шина нархи эълон қилингани йўқ.