Bugatti 1500 от кучига эга “Вейрон” ворисини намойиш қилди

Bugatti компанияси Veyron модели ўрнини эгаллайдиган янги Chiron гиперкарини расман намойиш қилди. Янги автомобиль 1500 от кучига эга W16 двигатели билан таъминланади. Моделнинг энг юқори тезлиги эса соатига 420 километргача чиқади.

“Широн”лар жами бўлиб 500 ададда чиқарилади. Нархи эса солиқларни ҳисобга олмаганда 2,4 миллион еврони ташкил этади. Илк машина 2016 йилнинг сентябридан йиғила бошланади.

Bugatti`дагиларнинг қайд этишича, двигатель қувватини ошириш учун муҳандислар агрегатнинг қарийб барча қисмларини қайтадан ишлаб чиқишди. Масалан, мотор кетма-кетликка асосланган наддув тизимига эга бўлди. Унда икки турбина пастроқ айланиш (оборот) вақтида ишлашни бошласа, нагнетатель (ички ёниш двигателларида: цилиндрга келадиган ҳавони олдиндан сиқиб берувчи компрессор)ларнинг иккинчи жуфтлиги тирсакли вал 3800 марта айланишга ўтганидан кейин ҳаракатга тушади.

Бундан ташқари, Chiron двигатели ёнилғини пуркаб берадиган 32та форсункали янги тизим, такомиллаштирилган совутиш тизими ва бошқалар билан таъминланган. Мотор етти босқичли роботлаштирилган тезлик узатмалар қутиси билан биргаликда ҳаракатланади. Суперкарга олд ва орқа ғилдираклари илдамловчи тизим ўрнатилган бўлиб, улардан бирининг ҳаракатини чеклаб қўйиш ҳам мумкин.

“Широн” турган жойидан тезликни юз км/соатга чиқариш учун 2,5 сония сарфлайди. 6,5 сонияда эса 200 км/соат тезликка эришади. Орадан 13,6 сония ўтганидан сўнг эса автомобиль соатига 300 километр тезликда ҳаракатланиб кетаётган бўлади. Стандарт режимда энг юқори тезлик соатига 380 километрни ташкил этади. Chiron`ни 420 км/соат тезликка олиб чиқиш учун эса махсус калитдан фойдаланиш талаб қилинади.

Chiron`нинг кузов панели карбондан тайёрланган. Модел пассив ва актив аэродинамик элементларга эга бўлган. Пассив элементлар айрим эҳтиёт қисмларни совутишда қўл келади. Масалан, бортдаги махсус ёриқлар шундай ишлаб чиқилганки, улар ғилдирак дискларига ҳавони йўналтириб, тормоз механизмларини совутади.

Bugatti Chiron шассиси бешта ишлаш режимига эга. Улар автомобилнинг йўл қопламасидан баландлиги, амортизаторлар қаттиқлигини ўзгартириш, олд ва орқа ғилдиракларни “тортадиган” қилиш, автомобиль аэродинамикаси, турғунлаштириш (стабилизация) ва тормоз тизими ҳаракатларини бошқариш каби вазифаларни бажаради.