Bugatti гулхан ёқишга жойи бўлган яхта тайёрлади

Люкс суперкарлар ишлаб чиқаришга ихтисослашган фаранг компанияси Chiron гиперкаридан таъсирланиб ясалган дабдабали яхта тасвирини кўрсатди.

Яхта номи Niniette бўлиб, у Palmer Johnson бюроси билан ҳамкорликда ишланган. Эслатиб ўтамиз: томонлар яхта лойиҳасига 2015 йилда киришган. Ҳамкорлик меваси сифатида Bugatti Chironга қариндош 20 метрли серҳашам яхта дунёга келди.

Niniette тўлалигича карбонпластикдан ишланган, пардозлашга чарм, табиий ёғоч ва мармар ишлатилган. Том маънода устаси фаранг бўлган “Бугатти”чилар кемача 44 узел тезликда (81 км/соат) сузишини айтмоқда.

Яхтада бир нечта ётоқхона, усти очиқ дам олиш майдончаси, бар, жакузи ва ҳаттоки, гулхан ёқадиган жойгача бор.

Яхта нархи айтилмади. Айтиш керакки, Bugatti Chiron гиперкари 2,6 млн доллар туради. Business Insider хабар беришича, чекланган ададли яхтани сотиш келаси йилнинг март ойидан бошланади.