Bugatti икки миллион евролик яхта қурилишида иштирок этади

Palmer Johnson Yachts компанияси Bugatti ишлаб чиқарувчиси билан ҳамкорликда қиймати энг камида икки миллион евро турувчи яхта ишлаб чиқаради. Лойиҳа Niniette («Ниньет») дея номланиб, у Эттор Бугаттининг қизи Лидия Бугатти исмининг қисқартирилган шаклидан олинган.

Яхта 1926 йилда ишлаб чиқилган Bugatti Type 41 Royale ҳамда 1934 йилда яратилган Type 57 C Atalante автомобиллари услубида бунёд этилмоқда. У шу турдаги моделлар учун анъанавий ҳисобланган икки рангда тақдим этилади. Кема корпуси карбондан ишлаб чиқарилади. Бу эса тезликни соатига 70 километргача оширишига имкон туғдиради.

«Ниньет» асосида бир корпус икки спонсон (палубанинг юқори қисми)ли Palmer Johnson SuperSport модели ётади. «Бугатти» Niniette`нинг жами учта – 6,2 метр, 13 ёки 27 метрли намуналарини тақдим этмоқчи.

Bugatti Niniette яхталарини қачон буюртма қилиш мумкинлиги ҳозирча номаълум. Битта яхтани тайёрлаш учун эса ўртача бир йил вақт сарфланади. Француз ишлаб чиқарувчисининг тайёр яхтаси фотосуратлари эълон қилинганича йўқ, расмий сайтга фақатгина унинг рендери (компьютер графикаси асосида ишлаб чиқилган сурати) тақдим этилди.