Citroen электр кабриолет-кроссоверининг янги концепти мода талқинига эга бўлди

Citroen компанияси ўтган 2015 йилнинг декабрида намойишга қўйилган E-Mehari электр кабриолет-кроссоверининг туркум равишда ишлаб чиқариладиган янги, концептуал нусхасини тақдим этди. Courreges модалар уйи билан ҳамкорликда ишлаб чиқилган прототип ўзига хос экстерьер ва интерьерга эга бўлиб, унда безакли хавфсизлик камарларини кўриш мумкин.

Прототип аввал намойишга қўйилган намунадан кузови ва ғилдирак дискларининг ўзига хос бўёқдорлиги, бошқача рул чамбараги, шунингдек, оқ чарм билан қопланган салони билан фарқланади. Бундан ташқари, дизайнерлар эшик тутқичларини ҳам тасмаларга алмаштиришган. Концепт билан биргаликда қимматбаҳо сумкаларнинг уч хил тури ҳам тақдим этилади.

E-Mehari`нинг концептуал талқинида қуввати 50 киловатт (68 от кучи) бўлган электр двигатель ўрнатилган. Мотор 30 киловатт-соатлик литий-полимерли аккумулятордан қувват олади.

E-Mehari бир марталик қувват билан 200 километр масофани босиб ўтади. Унинг энг юқори тезлиги эса соатига 110 километрни ташкил этади. Бироқ аккумуляторларни қувватлаш вақти анчагина узоқ муддатни талаб қилади: махсус қувватлаш станциясида батареялар саккиз соат ичида тўлса, хўжалик электр тармоғида бунинг учун 13 соат талаб қилинади.

Францияда E-Mehari савдоси 2016 йилнинг баҳоридан бошланади. Йил охирига қадар эса бошқа бозорларда ҳам пайдо бўлади.