Daimler Tesla’га қарши 6 та электромобиль ишлаб чиқаради

Германиянинг Daimler компанияси яқин йилларда бир нечта электромобилларни намойиш қилмоқчи. Афтидан, немислар бу борада Tesla’дан қолишмасликка қаттиқ қарор қилишган кўринади. Компания яқин келажакда олтита, баъзи маълумотларга кўра 9 тагача электрда ҳаракатланадиган автомобилларни ишлаб чиқариш арафасида турибди. Ҳозирча автомобилларнинг техник кўрсаткичлари ҳақида маълумот йўқ. Бироқ аввалроқ компания Mercedes-Benz бренди остида иккита седан ва иккита SUV  сериясидаги машиналарни тайёрлаши  тўғрисида хабар пайдо бўлган эди. Automobilwoche нашри эса асосий эътибор кроссовер ва SUV моделларига қаратилишини маълум қилган.

Reuters агентлигининг ёзишича, компания илк босқичда гибрид моделларни яратади. Масалан, SUV сериясидаги водород ва электрда (фақат электрда 45 км масофа босадиган) ҳаракатланадиган автомобилнинг тайёрланиши эҳтимолдан холи эмас. Чунки айнан бундай гибридлар атроф-муҳитга тамоман безарар ҳисобланади.

Шунингдек, Automobilwoche нашрининг маълум қилишича, мазкур электромобиллар 2018-2024 йиллар орасида ишлаб чиқарлар экан. Бироқ ушбу хабарнинг ўзи ҳам Daimler электрли автомобиллар соҳасига шиддат билан кириб келмоқчи эканлигини кўрсатади. Чунки компания АҚШнинг Tesla брендига ўхшаб бир-иккита модель билан эмас, балки бирданига бир нечта электромобиль серияларини сотувга чиқаришни режалаштирган. Бу шунчаки миш-миш бўлмаганлиги аниқ. Чунки немис автоконцернида бундай машиналарни тайёрлаш учун салоҳият, қувват ва ресурслар етарли.