Дубайда тилла қопланган McLaren намойиш қилинди (фото)

Қимматбаҳо машиналарга сайқал берувчи McLaren Special Operations (MSO) тюнинг-ательеси эгасининг номи айтилмаган McLaren 720Sга ишлов бериши учун 120 соатдан ортиқ вақт кетди.

McLaren 720S Дубайдаги автошоуда намойиш қилинди. Яккаю ягона нусхада ясалган спорт автомобилига тилла билан безак берилган. Хусусан, машинанинг экстерьерига ва мотор бўлмасига тилла қопланган. Интерьерига ишлов беришда тилладан ташқари қора чарм ва карбондан фойдаланилган. Салонида эса “1 of 1” шаклли ёрлиғи бор.

Спорткупенинг яна бир безаги шуки, орқа спойлерига жимжимадор араб ёзувида фирма асосчиси Брюс Макларендан иқтибос туширилган. Иқтибос маъноси: “Умр яшаб ўтилган йиллар билан эмас, ютуқлар билан ўлчанади”. 30 соатда ёзиб тугалланган ёзув Дубай шаҳрининг уфқдан тасвирини эслатади.

Спорткупенинг техник хусусиятлари аслидагидек қолган. 4 литрли моторнинг қуввати 720 от кучига тенг. Бу мотор соатига 341 км йўл босишга имкон беради.