Дунёдаги энг чиройли автомобиль қандай қиёфада бўлиши керак?

Британияликлар жаҳон автодизайнининг энг яхши унсурларини ўзида мужассамлаштирган дунёдаги энг чиройли автомобиль ҳақидаги тасаввурларини ифодалаб беришди.

Гап шундаки, Privilege суғурта компанияси автомобиль эгалари ўртасида сўровнома ўтказиб, уларга оддийгина савол беришди: қандай автомобиллар дизайнидаги қайси элементлар уларга кўпроқ ёқади? Олинган жавобларга асосланиб, Car журнали энг яхши дизайнерлик унсурларини ўзида бирлаштирган машина образини ишлаб чиқишди.

Шундай қилиб, Туманли альбион аҳолиси фикрига кўра, энг яхши автомобиль асосини Lamborghini Gallardo ташкил этади, машинанинг олд ва орқа қисмлари мос равишда Aston Martin DB9 ва Triumph Spitfire автомобиль моделларига тегишли. Энг чиройли автомобиль эшиклари Rolls-Royce Phantom`дан олинган бўлса, ғилдираклар Range Rover Evoque`га оид. Олд чироқлар образи Mini Cooper, орқа фаралар эса Audi A1 асосида жамланди. Йиғилаётган автомобилга Citroen C4 Picasso моделининг орқа томонни кўрсатувчи ойнаси якун ясаб берди.

Эслатиб ўтамиз, бир йил муқаддам британияликлар “дунёдаги энг ёмон машина”ни кўрсатиб беришганди. ўшанда Car журналистлари Warranty Direct суғурта компанияси маълумотларига асосланишган. Мазкур автомобилда бир қатор машиналарнинг энг муаммоли ҳамда тез-тез бузилиб қоладиган узатма ва агрегатлари ўрин олган эди.