Дунёнинг энг ишончли автомобиллари рейтинги тузилди

Американинг Consumer Reports нашри автоишлаб чиқарувчилар ўртасида ишончлилик рейтингини тузиб чиқди. Таҳлилчилар ўз тадқиқотларини интернет орқали автомобиль эгалари ўртасида ўтказилган сўровномалар якунлари асосида олиб боришди. Анкета саволларига умумий бўлиб 740 минг автомобилчи жавоб берган.

Шу йўл билан тузилган рўйхатнинг биринчи поғонасини япон автомобили эгаллади. Носозлик ва бошқа техник муаммолар Lexus автомобилларида энг кам қайд этилган. Иккинчи ўринда эса Toyota тилга олинди. Биринчи учталикни Германиянинг Audi компанияси якунлаб берди. Шунингдек, энг ишончли автоишлаб чиқарувчилар рейтингининг дастлабки ўнлигидан Mazda, Subaru, Kia, Buick, Honda ва Hyundai ҳам ўрин эгаллади.

Сўровномада қатнашган 28та бренд ичидан энг ёмон натижалар Infiniti, Cadillac, Ram, Jeep ва Fiat компанияларига тегишли бўлди. Мазкур автомобиллар эгаларининг аксарияти кўп босқичли автомат узатмалар қутиси ишидан нолишган. Шунингдек, кўплаб ҳайдовчилар ушбу автомобилларга ўрнатилган мультимедия тизимига норозилик билдирган.

Consumer Reports ҳисоботига кўра, Tesla Model S электромобили энг ишончсиз деб топилган. Сўровномаларда 1,5 минг худди шу модел эгалари иштирок этган. Кўпчилик ҳайдовчилар мазкур автомобилларнинг трансмиссия (двигателнинг ҳаракатини ёки айланишини ғилдирак ва тасмалар орқали бошқа механизмларга узатувчи махсус қурилма) ва қувватлаш тизимига нисбатан ўз хавотирларини билдиришган. Шунингдек, автомобиль эгалари ҳайдаш вақтида салонда эшитиладиган ғичирлаган товуш ҳамда эшик ва панорамали люк очилиши тизимидан норози. Бироқ 97 фоиз ушбу электрокар эгалари имкони бўлса яна бир марта шундай машинага эга бўлишини билдиришган.