Электромобиль ишлаб чиқариш бўйича етакчи компания қайси?

Сарлавҳадаги саволга Renault-Nissan, деб жавоб бериш мумкин. 2010 йилдан бери мазкур бирлашма 340 минг электрокар ишлаб чиқарди.

Компания маҳсулотлари орасида энг машҳури 200 минг нусхада чиққан Nissan Leaf хэтчбекидир. Тўғри, охирги вақтда Nissan Leafга Шимолий Америкада талаб камайди, аммо японлар унинг ўринбосарини тайёрлаяпти. Nissanнинг иккинчи электрли русуми e-NV200 фургони бўлиб, Япония ва Европада сотилади.

Renault эса ҳозирда уч турдаги электрли русум ишлаб чиқаради: Renault Zoe хэтчбеки, юк ва йўловчи ташувчи Renault Kangoo Z.E. русуми ҳамда Renault Twizy Z.E. субкомпакт электрокари. Renault Fluence Z.E. электрли седанини ишлаб чиқариш тўхтатилган. “Рено” русумлари орасида Renault Zoe хэтчбекининг бозори чаққон. Ҳозиргача 50 минг нусхадан ортиқ ишлаб чиқарилди.

Renault Zoe

Ўтган йилнинг июлида Renault-Nissan 250 минг электромобиль ишлаб чиқаргани тўғрисида ахборот берган. Ўтган бир йил мобайнида эса яна 90 минг русум чиқарди. Компания электрли русумлар бозори қизғинлигидан руҳланиб яқин-орада бир неча турдаги русумларни бирваракайига ишлаб чиқармоқчи. Келажак электромобилларники, чунки 2025-2030 йилларга бориб кўплаб мамлакатларда ички ёнув двигателли машиналарга батамом тақиқ ўрнатилади.