Электромобиллар нефть нархини тушириб юбориши мумкин

Яқин ўн йилликда экологик хавфсиз транспорт воситалари оммалашуви ортидан “қора олтин” нархи пастлаши мумкин. Вазиятни таҳлил қилган Bloomberg мутахассислари шу фикрга келишди.

Экспертлар айтишича, нефть нархи кескин пасайган 2015 йилдаёқ электромобиллар савдоси 60 фоизга ортди. Шу суръат сақланиб қолса, 2023 йилга бориб нефтга талаб кунига 2 млн баррелга камаяди. Бу нефть бозорида инқирозни келтириб чиқаради, “қора олтин” арзонлашади.

Автомобиль ишлаб чиқарувчилар ҳам худди шундай башорат қилишмоқда. Tesla ва General Motors яқин икки йил ичида нархи 30 минг доллардан паст, йўл захираси эса 320 кмдан ортиқ бўлган электромобилни ишлаб чиқармоқчи. Электромобиль ишлаб чиқаришни ривожлантиришга йирик автокомпанияларнинг ҳаммаси катта сармоялар киритмоқда: Ford, Volkswagen, Nissan, BMW ва бошқалар.

Шундай қилиб биз муқаррар технологик инқилоб арафасидамиз.

Нефть қазиб чиқарувчи мамлакатлар эса электрли транпортни ривожлантиришга ҳаммадан кам эътибор бермоқда. ОПЕК вакиллари 2040 йилга бориб ҳам жами сотилган машиналарнинг бир фоизини электромобиллар ташкил этади, деб ҳисоблайди. Нефть қазиб чиқарувчи Exxon компанияси ҳам шу фикрда.