Энг йирик автомобиль бозорлари эълон қилинди

Шу йилнинг етти ойи давомида жаҳон бўйича жами 7,2 млн дона енгил автомобиль ишлаб чиқарилган. Бу ўтган йилнинг шу даврига нисбатан 3,4 фоизга кўпдир. Жами 53, 11 млн дона автомобиль сотилиб, ўтган йилга нисбатан 3,5 % ўсиш қайд қилинган. Бу ҳақда аналитика билан шуғулланадиган «Автостат»  агентлиги LMC Automotive консалтинг компаниясига асосланиб хабар берган.

Хитой жаҳондаги энг катта автомобиль бозори сифатида тан олинган. Мамлакатда ўтган ой жами 1,8 млн дона автомобиль харид этилган. Бу ўтган йилга нисбатан 20,5 %га юқори.

Иккинчи ўринни жами 1,52 млн дона автомобиль сотган АҚШ бозори банд қилган.

Ғарбий Европа бозорларида эса ўтган ой жами 1,19 млн дона автомобиль сотилиб, бу кўрсаткич ўтган йилнинг шу даврига солиштирганда 1,7%га камроқдир. Шундай қилиб, Ғарбий Европа бозорида 2013 йилдан бери илк марта пасайиш кузатилган.

Шарқий Европа автомобиль бозорида июль ойида 292,2 минг дона автомобиль сотилган, бу эса ўтган йил июль ойидаги кўрсаткичдан 21,4%га кам. Ушбу минтақадаги энг сезиларли пасайиш Россияда (-17%) қайд этилган.

Жанубий Америкада 2016 йилнинг июль ойида 235,1 минг дона автомобиль ўз эгаларига етказилган. Бу ўтган йилга нисбатан 15,1%га камроқдир. Бундан ташқари, йирик автомобиль бозорлари қаторига Япония (411,4 минг дона, -2,5%), Канада (173,1 минг дона, -2,5%) ва Жанубий Корея (135,2 минг дона, -12,2%) ҳам киритилган.