Fenyr SuperSport – “араб тулпори”

10 ноябр куни Дубайдаги автосалонда W Motors Ливан фирмасининг иккинчи суперкари тақдимоти бўлиб ўтади. Ҳозирча омма эътиборига янги  автомобиль қисмларининг тушунарсиз расмлари ҳавола қилинган. Тахмин этиш мумкинки, биринчи суперкар Lykan HyperSportнинг кучайтирилган версияси ҳақида гап бормоқда. Lykan HyperSport осмон баробар нархи (3,4 млн доллар) ва “Форсаж 7” фильмидаги иштироки билан мухлислар ёдида қолган.

Олдингиси каби бу сафар ҳам машина устида ишлашга чет эл мутахассислари жалб қилинган, масалан, двигатель немис инженерлари чекига тушган. Машина мотори олдинги версиясидан ўзлаштирилиши кутилмоқда, аммо Lykan HyperSport каби 750 о.к. эмас, 1000 о.к.га етади. Fenyr SuperSport тўла карбон кузов ҳисобига “ака”сидан 200 кг енгилроқ бўлади.

Lykan HyperSport энг юқори тезлиги 385 км/соат бўлиб, 2,8 сонияда 100 км/соатга чиқар эди.  Fenyr SuperSport бундан кўра тезкорроқ ва кучлироқ бўлиши кутилмоқда.

Lykan HyperSport етти нусхада ишлаб чиқарилган ва дарҳол сотилиб кетган. Fenyr SuperSport суперкарини эса йилига 25 нусхадан ишлаб чиқариш режалаштирилмоқда.