Fiat Chrysler дунё бўйича 1,9 млн автомобилини қайтариб оляпти

Reuters агентлиги Италия-Америка автомобилсозлик компаниясининг маълумотига асосланиб сарлавҳадаги хабарни тарқатди.

Компания автомобилларининг хавфсизлик тизимида камчилик аниқланган. Баъзи турдаги аварияларда хавфсизлик ёстиқчаси ишламайди, шунингдек, хавфсизлик камарида нуқсон бор.

2010-2014 йилларда чиқарилган Chrysler Sebring, Chrysler Cirrus, Chrysler 200, Dodge Caliber, Dodge Avenger, Lancia Flavia, Jeep Patriot ва Jeep Compass авторусумларининг барчаси қайтариб олинади.

Машиналар энг кўп қайтариб олинадиган мамлакат АҚШдир. Океан ортидан 1,4 млн автомобиль қайтарилади. Бундан ташқари, Канададан 142 минг, Мексикадан 81 минг, қолган мамлакатлардан 284 минг машина қайтади. Россияликлар ҳам 3021 дона машинани қайтариб беради.

Маълумотларга кўра, хавфсизлик ёстиқчаси носозлиги туфайли 3 киши ҳалок бўлган ва 5 киши шикаст кўрган.