Фотогалерея: Қайта туғилган 10 та автомобиль

Саид Мамуров
16-05-2017

Йирик автомобиль ишлаб чиқарувчилар йиллар ўтиб баъзи эски автомобилларга қайта ҳаёт бериб, уларни янгиланган кўринишда ишлаб чиқаради. Daryo.uz нашри ана шундай қайтадан ишлаб чиқарилган автомобиллар жамланмасини тақдим этди.

BMW 8 Series

Машина рўйхатдаги ягона қайта туғилмаган автомобиль ҳисобланади. Э31 индексига эга бўлган модель 1989 йилдан 1999 йилгача ишлаб чиқарилган. Жами ишлаб чиқарилган автомобиллар сони 31 мингтадан ошган. Автомобиль модификациясига қараб, унга V8 ва V12 двигателлар ўрнатилган. Энг яхши позиция бўлган 850CSi 5,6 литр сиғимли 12 цилиндрли 380 от кучига эга двигатель билан жиҳозланган.

Янгиланган талқин май ойининг охирида Concorso dʼEleganza Villa dʼEste конкурсида намойиш этилади. Автомобильнинг серияли кўриниши 2018 йилда пайдо бўлади. Янгиланган М8 талқини 600 от кучига эга V8 твин-турбо двигатели билан жиҳозланиши кутилмоқда.

Mitsubishi Eclipse

Япон авто ишлаб чиқарувчиси томонидан 1989—2011 йилларда ишлаб чиқарилган спорткарнинг сўнгги авлоди 3,8 литр сиғимли 266 от кучига эга V6 двигатели билан жиҳозланган.

2017 йилнинг февраль ойида Mitsubishi Motors янги Eclipse’ни намойиш этди. Автомобиль номига Cross қўшилган. Янги Eclipse Cross ярим литр сиғимли бензин турбомоторига, шунингдек, 2,2 дизель моторига эга.

Lincoln Continental

Lincoln Continental америкалик ишлаб чиқарувчининг конвейеридан уч марта чиқиб кетган: 1948 йил, 1980 йил ва 2002 йил. 2015 йилда компания автомобилнинг янги кўринишини тақдим этди. 2016 йилда Детройтда бўлиб ўтган моторшоуда Lincoln қайта туғилган автомобилнинг серияли кўринишини тақдим этди.

Янги Continental’нинг салони ҳақиқий чарм, ёғоч ва алюминийдан ишланган. Шу билан бирга седанда анъанавий эшик очгичлар йўқ. улар кузовда эмас, ойнанинг пастки қисмида жойлашган. Автомобиль уч литр сиғимли 405 от кучига эга твин-турбо двигателига эга.

Ford GT

Биринчи GT40 1969 йилда 105 нусхада ишлаб чиқарилган. 2004 йилда янги GT ишлаб чиқарилган. 2006 йилгача америкалик автоишлаб чиқарувчи тўрт мингдан ортиқ GT ишлаб чиқарди, шундан сўнг автомобиль конвейердан чиқиб кетди.

Янги GT 655 от кучига эга, энг юқори тезлиги 347 км/соат. 2016 йилда GT нинг пойгачи GTE талқини 24 соатли Ле Ман пойгасида ғолиб чиқди.

Nissan Тerrano

Йўлтанламас 1993 йилдан 2006 йилгача ишлаб чиқарилган. 2013 йилда янги Nissan Тerrano тақдим этилган. Уни аввалги талқин билан фақат номи боғлаб туради, чунки янги талқин Renault Duster’нинг нусхаси ҳисобланади.

Citroen C6

2005 йилда тақдим этилган Citroen C6 седани шунчалик шинам ва ноодатий бўлганки, ундан бирданига Франциянинг икки президенти Жак Ширак ва Николья Саркози фойдаланган. 2012 йилда автомобилнинг ишлаб чиқарилиши тўхтатилган.

Янги авлод Citroen C6 2016 йилда пайдо бўлди. Автомобиль фақат хитой бозори учун мўлжалланганлиги сабабли у Пекин автосалонида намойиш этилган.

Fiat 124 Spider

124 оиласи ўз ичига купе ва кабриолет кирган. Биринчи автомобиль 1967 йилдан 1975 йилгача ишлаб чиқарилган. Иккинчиси эса 1966—1985 йилларда ишлаб чиқарилган.

2015 йилнинг май ойида Fiat 124 Spider яна қаторга қайтди. Янги автомобиль сўнгги авлод Mazda MX-5 асосида яратилди. Автомобиль 1,4 литр сиғимли 160 от кучига эга двигатель билан жиҳозланган.

Acura NSX

Купе 1990 йилда тақдим этилган ва 2005 йилгача ишлаб чиқарилган. У кўп миқдорда ишлаб чиқарилган биринчи алюминий кузовли автомобиль ҳисобланади.

Янги NSX уч йилдан сўнг тақдим этилди. Унинг учта элетродвигателли агрегати асосида 3,5 литр сиғимли 500 от кучига эга бензин мотори туради. Электродвигателларнинг биттаси тезлик олишга хизмат қилади, қолган иккитаси эса олд ўқ ғилдиракларини айлантиради.

Alfa Romeo Giulia

Автомобиль 1962 йилдан 1978 йилгача ишлаб чиқарилган. 2015 йилда янги авлод Giulia тақдим этилди. Янги талқин 510 от кучига эга турбомотор билан жиҳозланган.

УАЗ Hunter

УАЗ Hunter 1972 йилдан буён деярли ўзгаришларсиз яшаб келди. У шунчаки УАЗ 469 бўлган. 2014 йилда Hunter маънавий ва жисмоний жиҳатдан эскирган ҳисобланиб, 2015 йилда ишлаб чиқаришдан олиб ташланди.