Французлар 402 от кучига эга купени намойиш этди

DS совринли маркаси E-Tense номли янги концептуал купе ҳақида маълум қилди.

402 от кучига эга электромобилнинг “юз очди” (премьера) маросими Женевадаги Халқаро автосалонда келаси ҳафта ўтказилади.

DS E-Tense ташқи қиёфаси Divine DS нишона нусхасининг услубида яратилган. Машина ерга ёпишган, радиатор панжараси кенг, бамперлари баҳайбат, адаптив диод чироқли фараларга эга, 20 дюймли ғилдирак дисклари енгил қотишмадан ясалган. Купе ўлчами 4,12 х 2,08 х 1,29 метр, вазни 1800 кг. Карбонпластикали монококдан ясалган.

DS E-Tense электромотори 402 от кучига эга, айлантириш моменти 516 Н∙мга тенг. Литий-ионли аккумулятор тўла зарядланса 360 км йўл босади. 4,5 сонияда 100 км/соат тезликка етишади. Энг юқори тезлиги эса 250 км/соатдир.

DS маркаси вакилларининг расмий ахборотига кўра, нишона нусха (концепт) салонини жиҳозлаш ва синаб кўришга 800 соатдан ортиқ вақт кетди. Машина рули лолага ўхшайди, олд панелга пўлат қопланган, 10 дюйм экранли ва 9 карнайли мультимедиа тизими бор.

DS компанияси E-Tenseни серияли ишлаб чиқариш эҳтимолига тўхталмади. Электрли спорткар концептлигича қолиши мумкин.