Гаражга қамалган тўққиз нодир машина

Қайсидир гаражда қамалиб ётган нодир автомобиль оммага ҳавола этилиши муносабати билан ёзиладиган хабарларда, одатда, топилманинг қимматгина нархи эслатиб ўтилади. Аммо нодирлик ва қимматбаҳолик ҳар доим ҳам бир маҳсулотда жамланавермайди. Ўз синфида ягона бўлган қуйидаги тўққиз автомобилнинг баҳоси осмон баробар эмаслиги билан эътиборни тортади.

Citroen 2CV

Совуқ рангли, автомобилдан кўра ботинкага ўхшайдиган бу машина Иккинчи жаҳон урушидан олдин тайёрланган. Немис қўшинлари Францияга ҳужум қилганда Citroen инженерлари саросимада қолиб, бўлажак бестселлер душман қўлига тушмаслиги учун гаражга яшириб қўйишган.

Гараж эса… 1995 йилда очилди. Аниқроғи очилмади, гараж томини тешиб прототиплар чиқариб олинди. Сўнг машиналар тикланди ва компания музейининг ихтиёрига ўтказилди. Ҳозиргача бизга 2CVнинг илк прототипларидан бештаси етиб келган.

Seagrave American Jet

Сиз кўриб турган ноёб прототип Seagrave компаниясининг енгил автомобиллар бозорига кириш учун бир уринишидир. Бунгача Seagrave фақат ўт ўчириш машиналари ишлаб чиқарган.

Кишибилмас жойга яширилган машинани 2014 йилда топиб олинди. Янги уй олган одам уйни кўздан кечириш жараёнида туппа-тузук машина топиб олди. Даставвал уни AMC компаниясига қарали русум деб ўйлашди, аммо ундан-да қизиқ машина бўлиб чиқди.

Ихчам купе шишапластик кузовлидир. Ўз даврида уч минг доллар атрофидаги нархда сотилган. 2,4 литрли двигатели 65 от кучига эга. Уйдан топилган бу нодир машина арзон кетди: 12500 доллар.

Cadillac Eldorado Biarritz

Ушбу “Кадиллак” 1962 йилги Eldorado Biarritz русумининг даракчиси бўлиб, профессионал гольфчи Уолтер Хеген уни узоқ йиллар миниб юрган. Машина аввалига Чикаго автосалонида кўрсатилган, сўнг Уолтер олган.

Машина гаражда брезентга ўраб яхши сақланган. Гольфчидан уни харид қилиш учун келишганда атиги 38 минг мил (61 минг км) йўл босган эди.

BMW M1

Ҳаммаси бўлиб ўртача моторли BMW M1 суперкаридан 456та ясалган, аммо 2015 йилда гараждан топилган автомобиль жуда ноёбларидан эди. У М1нинг 1979 йилда тайёрланган энг биринчи прототипи бўлиб, кейинроқ Procar BMW M1 чемпионатида иштирок этиши учун пойга болидига айлантирилган.

Автомобиль гаражда 30 йил турган, босган йўли эса бир ярим минг кмдан сал ошади. Гараж, аниқроғи, машина эгаси харидордан 81 минг доллар сўради.

Lagonda V12 Rapide by Hooper

Бу топилмани 2014 йилда аниқлашган ва шу заҳотиёқ кимошдига қўйилган. Lagonda V12 1939 йилда тайёрланганда компания Aston Martin таркибига ҳали кирмаганди. Машина ўша вақтда кўркам саналган кузови билан ажралиб турарди.

Машинанинг урушгача тарихи аниқ эмас. Иккинчи жаҳон урушидан сўнг саноатчи Гарри Элларднинг қўлига тушди. Саноатчи 1084 йилгача уни миниб юрди. Шундан бери Lagonda бостирмада турибди ва йилдан-йилга ерга чўкиб боряпти. Устидаги чангни кўринг. Машина бор-йўғи 32 минг км босган.

Ford Mustang BOSS 302 Concept

Бир қарашда бу оддий “Мустанг”, аммо серияли BOSS 302га назар солсангиз, ундай эмаслигини пайқайсиз. Кўп сақланган бу автомобилни ҳам узоқ йиллар йўқолдига чиқаришган. Хашаклар орасидан “Мустанг” чиқариб олинди ва дарҳол интернетда савдога қўйилди.

Costin Nathan GT

Мултфилмдагига ўхшаш машина Lotus компанияси инженери ва тюнинг мутахассисининг қўшма фаолияти мевасидир. Машина-мултикнинг шассиси қувурдан ясалган. Уни тайёрлашда оддий фанердан фойдаланилган. 4 цилиндрли Lotus двигатели бор.

Автомобиль 1966 йилги чемпионатда иштирок этиб, беш марта биринчи ва бир марта иккинчи ўринни эгаллаган. Бунда 320 кгли вазни ҳам ёрдам берганини эслаб ўтиш жоиз. 1967 йилда Ле-Манда чиқиши керак эди, аммо молиявий қўл қисқалик қилиб, лойиҳа ёпилди.

Costin Nathan GT иштирок этган пойгаларнинг деярли барчасида ғолиб чиққан. Собиқ ғолиб ўтган йилнинг июнида ташландиқ ҳолда гараждан топилди ва кимошдига қўйилиб 80 минг фунтга сотилди. Кутилганидан уч баробар кўпига кетди.

Mercedes 500K

Ҳамма машинага ҳам кимошдида тантана билан сотилиш насиб этмайди. Ноёб Mercedes 500K автомобили Лос-Анжелесдаги металл чиқиндилари уюмидан топилган. Агар 1970 йилда Кўркамлик танлови юлдузи бўлган бу машина бир оз одамбашара ҳолда бўлганда 10 млн доллардан ортиққа баҳоланиши мумкин эди.

Lamborghini Bertone Miura Roadster

Ягона нусхадаги Miura Roadster автомобилини хароб ҳолда гаражда учратишганига ишониш қийин, аммо бу бўлган. 2007 йилда у яхшилаб реставрация қилинди. Кўп ўтмай бор салобати билан омма олдида намоён бўлди.

Шоу-кар даставвал 1968 йилда Брюсселдаги Salon de L’Automobile салонида тақдим этилганди. Кузови пишиқ эмаслиги сабаб ялпи ишлаб чиқарилмаган, кейинроқ бир оз такомиллаштирилиб сотиб юборилган. Шундан сўнг қўлдан қўлга ўтиб юрган ва кишибилмас бир гаражда 10 йил сақланган.

Хонадонингизда нодир автомобиль борми? Ташлаб юборманг, эҳтиётлаб сақланг, имкон топиб реставрация қилинг ва кутинг. Нодир машиналар савдосидан ҳали зарар кўрган киши йўқ. Харидори, албатта келади ва сиз бой бўласиз.

motor.ru асосида тайёрланди