Genesis G80 шоҳона седанини тақдим этди

Тақдимот Жанубий Кореянинг Пусан шаҳридаги автосалонда ўтказилди. G80 авторусуми Genesis эски седани ўрнини эгаллайди.

Тажовузкор қиёфали машина спортча осмага эга. 3,8 литрли V6 двигатели бензинга юради. 315 от кучига эга. Ундан ташқари ҳашаматли Sport версияси ҳам ишлаб чиқарилади. Ҳашаматли версиянинг 3,3 литрли битурбо мотори бўлиб, 370 от кучи ва 510 Н·м айлантириш моментига эга.

2020 йилга бориб Genesis шоҳона брендининг русумлар сафи олти автомобилга етади. Ҳозирда G90 ва G80 седанлари тақдим этилган.

Келажакда Genesis маркаси остида икки кроссовер ва спортча купе ишлаб чиқарилади. Спорткарга юқорида эсланган 3,3 литрли бензинли V6 мотор ўрнатилиши мумкин. Бироқ 5 литрли V8 агрегати пайдо бўлиши эҳтимоли ҳам йўқ эмас.

Дарвоқе, Genesis русумлари сафига гибрид автолар қўшилиши мумкинлигини Hyundai Motor етакчиларидан бири тасдиқлади.

Genesis русумлари сафини кенгайтириш мақсадида компания дизайнерлар бўлинмасини таъсис қилди. Бўлинма раҳбари илгари Audi, Bentley, Lamborghini, Seat ва Skoda авторусумлари дизайнини ишлаган тажрибали мутахассисдир.