GM Powertrain: Двигателларимиз газга эмас, бензинга мўлжалланган

GM Powertrain Uzbekistan Ўзбекистон-АҚШ қўшма корхонаси томонидан ишлаб чиқарилаётган двигателлар газда эмас, бензинда ишлашга мўлжалланган. Бу ҳақда корхона бош директори Женнифер Бигелоу АҚШнинг Тошкентдаги элчихонасида ўтказилган матбуот анжумани чоғида баёнот берди.

Илгарироқ хабар қилинганидек, Бигелоу хоним қўшма корхона самарадорроқ двигатель яратиш устида ишлаётганини хабар қилди.

“Корхона келажак ҳақида ўйлаган ҳолда янги, самарадорроқ двигатель яратиш устида ишламоқда”, — деди у.

“Бизнинг экологияга бўлган талабларимиз жуда қаттиқ, — таъкидлади Бигелоу хоним. – Масалан, сувни биз қудуқдан оламиз ва яхшилаб тозалаймиз. У ерда биз кучли тозалаш иншоотларини ўрнатганмиз”.

Журналистлардан бири газда ишлайдиган Lacetti Gentra фойдаланувчилари цилиндр блоки тез ишдан чиқишидан нолиётганини айтди. Бунга жавобан директор “бизнинг моторларимиз газга эмас, бензинга мўлжалланган”, деб жавоб берди.

Маълумот учун, GM Powertrain Uzbekistan енгил автомобиллар учун йилига 1.2 ва 1.5 мл ҳажмли 225 минг дона куч қурилмаларини ишлаб чиқаради. У Асакадаги асосий автойиғиш конвейерига Spark, Cobalt, Lacetti (Gentra) русумларига мўлжалланган двигателлар етказиб беради.

Манба: Kun.uz