GM Uzbekistan экспортга чиқариладиган машиналарига «ЭРА-ГЛОНАСС» тизимини ўрнатади

GM Uzbekistan сарлавҳадаги режани 2017 йил охиригача амалга оширишни мўлжаллаяпти

“Россия ва МДҲ бозорларидаги мавқеимизни сақлаш, шунингдек, савдо кўламини ошириш мақсадида экспортга чиқариладиган бир қатор енгил автомобиль русумларига «ЭРА-ГЛОНАСС» тизими ўрнатилмоқда”, дейилади давлат компаниясининг хабарида.

2016 йилдаги давлат инвестиция дастурига мувофиқ автомобилларга «ЭРА-ГЛОНАСС» терминалларини ўрнатиш лойиҳасини 2017 йилда якунлаш режалаштирилмоқда. Лойиҳа 53,2 минг терминални ўз ичига олади, инвестиция ҳажми 8 млн доллар атрофида.

Ҳозирги вақтда Асакада жойлашган корхонада қуйидаги русумлар ишлаб чиқарилмоқда: беш седан — Nexia, Cobalt, Lacetti, Gentra ва Malibu; иккита кам литрли русум  — Matiz ва Spark; йўлтанламас – Captiva; минивэн – Orlando; микроавтобус – Damas ва унинг юк ташувчи тури – Labo. Лойиҳа бўйича корхона йилига 250 минг автомобиль ишлаб чиқариш қувватига эга. Экспортбоп русумлар асосан Nexia, Cobalt, Matiz ва Spark.

Европа бизнес уюшмаси автомобиль ишлаб чиқарувчилар Қўмитаси маълумот беришига кўра, охирги йилда GM Uzbekistanнинг Россиядаги савдо ҳажми 1,46 марта тушиб кетган.