Голландлар “бир парча” автомобиль ясади

Ҳа, сарлавҳадан ажабланманг, бу ўзиюрар нарса автомобилдан кўра катта плитанинг бир парчасига, синиғига ўхшайди. Сиз балки кемага ўхшатарсиз.

Голландиядаги United Nude пойабзал компанияси янги Lo Res автомобилининг нишона нусхаси (концепт) тасвирини намойиш этди. У Lamborghini Countach супермашинасининг наридан-бери чизилган сурати прекциясини эслатади.

Дизайнерлар пойабзал, кийим-кечак тасвирини яратишга ихтисослашган компьютер дастурида машина қиёфасини чизишган. Дастур объект нуқталари жойлашувини ўзгартириб тасвирни соддалаштириб ташлайди. United Nude буни “ортиқчаликдан холи, тоза шакл” деб таърифламоқда.

Натижада мутлақо шаклсиз автомобиль қиёфаси яралди. Уни “дизайнсиз машина” деб аташмоқда. Lo Resнинг кузови поликарбонатдан ишланган, чунки ҳайдовчи рулга ўтириши учун уни тепага кўтариб кириши керак. Интерьери йўқ ҳисоби, аммо олтиқиррали руль чамбараги диққатни тортади, муаллифларнинг айтишича у зангламас пўлатдан ясалган эмиш.

Lo Resни тўлақонли ишлаб чиқариш муддати эълон қилинганича йўқ. Аммо голландиялик дизайнерлар ҳали машина лойиҳаси қиёмига етмаганини, келажакда янада янги лойиҳалар устида ишлашларини таъкидлаб ўтди.