Ҳиндлар BMW X6га ўхшаш кроссовер яратди

Mahindra&Mahindra компаниясига қарашли янги кроссовернинг номи XUV Aero. Деҳли шаҳридаги Auto Expo кўргазмасида машинанинг нишона нусхаси йиғилганларга намойиш этилди.

Mahindra XUV Aero “йўлтанламас купе” услубида ишланган бўлиб, ташқи кўриниши BMW X6 ва Mercedes-Benz GLE Coupe русумларини эслатади. Залварли бампер, тажовузкор олд қисм, радиаторнинг кенг панжараси, диод чироқли фаралар, орқа диффузор ва ишланган газларни чиқариш қувурчаси (патрубок) машинанинг ўзига хослигини таъминлайди.

Mahindra XUV Aeroнинг рули ва чарм қопланган ўриндиқларига, самолётникига ўхшаш олд бошқарув панели ва рақамли ускуналар панелига алоҳида тўхталиш жоиз.

Автомобилга mHawk турболашган двигатель ўрнатилган. Мотор 210 от кучига эга, айлантириш моменти кучли. Ҳинд инженерлари айтишига кўра, XUV Aero юз тезликка олти сонияда эришади.

Компания раҳбарияти кроссоверни кўп сонда ишлаб чиқариш тўғрисида қарор қабул қилганича йўқ. Mahindra&Mahindra вакиллари бу омманинг муносабатига боғлиқлигини таъкидлаб қўйишди.