Hyperloop поездида ойналар ўрнида дисплейлар бўлади

Hyperloop One фирмаси билан параллел равишда вакуум поездини ишлаб чиқаётган Hyperloop Transportation Technologies (HTT) компанияси вагон прототипини намойиш этди. Вагон ойналари ўрнига дисплейлар ўрнатилган бўлиб, унда 3D-тасвирни томоша қилиш ёки йўл маълумотлари билан танишиш мумкин.

Hyperloop лойиҳасига кўра, поезд ёпиқ қувур ичида ҳаракатланади ва йўловчилар ташқарида бўлаётган нарсаларни кўра олмайди. HTT таклиф қилаётган дисплейларда эса исталган тасвирни, маслаан, манзараларни кўрсатиш мумкин бўлади. Бундан ташқари, бу экранларда бошқа турли маълумотлар, хусусан, ҳаракат тезлиги ва ҳарорат ҳақидаги маълумотлар ҳам кўрсатилади.

Hyperloop ғоясини илк бор 2013 йили Tesla Motors ва SpaceX компаниялари раҳбари Илон Маск илгари сурган эди. Маск мазкур лойиҳада қатнашишдан бош тортди, ишланма учун бошқа инвесторлар пул киритиб, Hyperloop Transportation Technologies ва Hyperloop Technologies (кейинчалик у Hyperloop One деб қайта номланди) компанияларига асос солишди.

Hyperloop One 2016 йил майида вакуум поездининг ҳаракатланувчи ускунасини очиқ осмон остида синовдан ўтказган эди. Йил охиригача эса вакуумли қувур ичида синовлар бошланиши кутилмоқда. Сиқилган ҳаво ва паст босим ҳисобига поезд ўз тезлигини соатига 1200 километргача ошириши мумкин.