Hyundai компанияси электрлаштирилган моделини намойиш қилди

Женева автосалони очилиши арафасида Hyundai компанияси Toyota Prius’га рақобатчилик қилувчи Ioniq электрлаштирилган моделини намойиш қилди. Бу ҳақда Auto Express нашри маълум қилди.

Янги машина ўзининг япон рақобатчисидан вазминроқ ташқи кўриниши билан фарқланади.

Мижозларга автомобилнинг учта асосий комплектация варианти таклиф қилинади: тўлиқ электрлаштирилган, гибрид ҳамда электр тармоққа улаш имкониятига эга гибридли.

Hyundai’нинг таъкидлашича, комплектациянинг барча вариантларида литий-ионнли аккумуляторлар ишлатилади, бу эса машинага Prius’дан устунлик бериши керак.

Компания йўлда самарадорликни яхшилаш учун машинани Prius’даги каби поғонасиз узатмалар қутиси билан эмас, балки 6 поғонали автоматик узатмалар қутиси билан жиҳозлашни афзал кўрди.

Биринчи бўлиб моделнинг гибридли версияси ишлаб чиқарилади. У 1,6 литрли ва 104 от кучига эга бензинли двигатель ҳамда 43 от кучига эга электромотор билан жиҳозланади. Гибрид режимида ёнилғининг 100 км масофага ўртача сарфи 4,3 литрни ташкил қилиши керак.

Ioniq ичи замонавий экологик тоза ва техник жиҳатдан мукаммал материалларнинг қўлланиши ва илғор хавфсизлик тизими билан фарқланади. Машинада iPhone ва Android асосида ишловчи қурилмалар билан интеграция ҳамда телефонлар учун симсиз қурилма кўзда тутилган.

Ioniq модели Hyundai ва Kia компаниялари 2020 йилгача ишлаб чиқаришни режалаштираётган экологик тоза 22 та моделдан бири бўлиши керак.

Манба: Kun.uz