Hyundai “тахланадиган” автомобиль ишлаб чиқармоқчи

Корея автомобилсозлари “йиғма” автомобилга патент олишди. Расмий ҳужжатда қайд этилишича, янги машина тахланган ҳолида автотураргоҳда жуда кичик жойни банд қилади, фойдаланишга шай ҳолида эса тўлақонли машинага айланади.

У схемасига кўра чақалоқларнинг йиғма аравачасига ўхшаб кетади. Корейслар шу йўл билан автотураргоҳларда жой етишмаслиги муаммосини ҳал этишмоқчи.

Тахланадиган автомобилнинг иккита поли бўлади. Биринчиси олдинги ғилдиракка алоқадор, иккинчиси орқа ғилдиракка. Тузилиши сурилма ғаладонни эсга солади. Ҳайдовчи полни силжитиб автомобиль ғилдираклари базасини катталаштириши ва кичрайтириши мумкин.

Бундан ташқари томини ҳам тахласа бўлади. Машинанинг юқори қисми ичкарига киради ва ёпилади.

Тахланувчи машина номи хусусида Hyundai оғиз очмади. Шунингдек, техник тавсифи, тақдим этилиш санаси ҳам ошкор этилгани йўқ.

Тахланадиган автомобиль яратиш ғояси янги пайдо бўлгани йўқ. 1992 йилда Renault Zoom концепти яратилган бўлиб, “тахланувчи машина” яратилишига қайсидир даражада эришилган эди. Бу машина тахланса, узунлиги 2,65 метрдан 2,3 метрга қисқаради.