Италиялик талабалар Женевада “оригами-машина”ни тақдим этишди

Туриндаги IDE дизайн мактаби талабалари Женева автосалонида Quattroroute автомобиль нашри билан ҳамкорликда ишлаб чиқилган электр концепт-карни намойиш қилишди. Shiwa номини олган прототип дизайнини ишлаб чиқишда талабаларни оригами санъати илҳомлантирган.

Машинани ишлаб чиқишда бу йил диплом ҳимоясини бажарадиган 11 нафар талаба иштирок этди ва Shiwa концепти улар учун битирув малакавий иши бўлди. Автомобиль конструкциясида енгиллаштирилган металлар ва композит материаллардан фойдаланилган.

Прототип ёруғлик диодли чироқлар ва батарея даражасини кўрсатиб турадиган ташқи OLED-индикаторлари билан таъминланган. Қувват қурилмасининг техник хусусиятлари тўғрисида ошкор қилинганича йўқ. Фақатгина машинанинг ҳам олд, ҳам орқа ғилдираклари “тортиши” маълум.

Интерьер фотосуратлари ҳам тақдим этилмаган, бироқ компания хабарига кўра, салонга ҳаракатга қарши томонга айланувчи тўртта ўриндиқ жойлаштирилган. Шунингдек, автомобилга автоном бошқарув тизими ўрнатилган ва машина ҳайдовчининг кайфияти ва истакларига мослашади.

Сўнгги икки йил ичида IDE Shiwa каби бир неча концептлар намойиш қилинди. Масалан, ўриндиқлари ҳаракатга тескари тарафга айланадиган ҳайдовчисиз прототип “Мерседес” томонидан тақдим этилган бўлса, Хитой-Исроил компанияси саналган Qoros компанияси ҳайдовчининг ҳиссиётларига жавоб қайтарадиган концептни намойишга қўйган эди.