Женевада SsangYong маркасининг ғалати тақдимотлари

Корейс автомобилсозлари кўп йилдан бери кетма-кет намойиш этаётган кроссоверлари бир-биридан фақат шакли билан фарқ қилади. Тўғри, бу гал компания нишона нусха (концепт) эмас XLV серияли автомобилини келтирди.

Бу русум Tivoli кроссоверининг 238 ммга чўзилган версияси бўлиб, аллақачон Кореяда сотиш бошланган. Беш йил ўтган бўлса-да (ушбу сериянинг нишона нусхаси 2011 йилда намойиш этилган), автомобилнинг жимжимадор қиёфаси шундайлигича турибди. Бироқ яхши тарафлари ҳам йўқ эмас.

Масалан, юкхона ҳажми 720 литр бўлиб, орқадаги йўловчиларга қўшимча жой бўлади, қолаверса яхши ёритилган. Кроссоверга 1,6 литрли бензинли (128 от кучи, 160 Н•м) ва дизелли (115 от кучи, 300 Н•м) моторлар ўрнатилган. Двигателлар 6 поғонали механик ёки автомат қути билан ишлайди. Тўла узатмага эга.

Кореяликлар тақдим этган яна бир автомобиль SIV-2 нишона нусхасидир. Янги машинада ҳам айтарли ўзгариш йўқ. Машина асосида ўша Tivoli платформаси ётибди. Ташқи қиёфаси эса XIV-1 кроссоверининг жузъий ўзгаришга учраган кўриниши. Ягона фарқ SsangYong SIV-2 “юмшоқ гибрид”лигидадир, 10 кВтли электромотор қўшимча функцияга эга. Асосий юмуш 1,5 литрли турболашган двигатель зиммасида.

Юқоридаги таққослардан келиб чиқиб айтиш мумкинки, бу вазиятда SsangYong Женевада муваффақият қозониши қийин масаладир.