Жеймс Бонднинг Aston Martin DB10 автомобили 3,5 миллион долларга сотилди

Жеймс Бонд ҳақидаги 24- фильм – “Спектр” учун махсус ишлаб чиқилган 10 дона Aston Martin DB10 суперкарларидан бири Christie’s аукцион уйидаги савдоларда 2 миллион 434 минг фунт (3 миллион 425 минг доллар)га сотилди. Мазкур машина кўпи билан 2,1 миллионга сотилади, деган тахминлар шу йўл билан чиппакка чиқарилди.

DB10 купеси V8 Vintage модели базасида ишлаб чиқарилган эди, бироқ унинг ғилдираклари бироз катталаштирилиб, ғилдираклар базаси кенгайтирилган. Сyперкар 4,7 литр ҳажмли саккиз цилиндрли мотор билан таъминланган бўлиб, қуввати 436 от кучига тенг.

Картинани суратга олиш ишлари ниҳоясига етганидан сўнг бор-йўғи уч дона автомобиль қолди. Бошқалари эса трюклар постановкаси вақтида шикастланиб кетди. Сақланиб қолган машиналардан бири Eon Productions кинокомпаниясида тақдим этилган бўлса, яна бири Aston Martin музейига юборилди. Учинчиси эса савдога қўйилди.

“Спектр” фильмидаги буюмлар ва аксессуарлар сотилган Christie’s савдолари 18 февраль куни Лондонда бўлиб ўтди. Уларда жами бўлиб 2 миллион 785 минг 500 фунтлик (4 миллион долларга яқин) буюмлар сотилди. Жумладан, Жеймс Бонднинг Omega соатлари, бошқа бир қаҳрамон Дэниел Крейгнинг Мексикадаги “Ўлганлар куни” фестивали чоғида кийган костюми мос равишда 92,5 минг (132 минг доллар) ва 98,5 минг фунт (141 минг доллар)га сотилди.