Жеймс Бонднинг Aston Martin машинаси деярли ярим миллион долларга сотилди

Жосус 007 Жеймс Бонд ҳақидаги фильмлардан бирида кўриш мумкин бўлган Aston Martin Centenary Edition Vanquish автомобили Christie's аукционида 468,5 минг долларга сотилди. Kun.uz шу ҳақда ёзмоқда.

Аукцион 20 апрелда Нью-Йоркда бўлиб ўтган. Савдоларни “қиздириш” учун унда Бонднинг ролини ижро этган актёр Дэниэл Крейгнинг ўзи ҳам иштирок этган.

Автомобил ҳақида гапирадиган бўлсак, у Aston Martin компаниясининг 100 йиллигига 2014 йилда 100 дона миқдорда ишлаб чиқарилган.  

Машиналар енгил алюминий платформада яратилган ва двигатели ишчи ҳажми 7,3 литрни ташкил қилади ва 760 от кучига эга. Машинанинг максимал тезлиги  295 км/соатни ташкил қилади. 

Сотувга қўйилган автомобил қўлда йиғилган ва олий сифатли чарм қоплама, алькантара ва полировка қилинган алюминийдан антиқа безак олган. Унинг яратилишида Крейгнинг шахсан ўзи иштирок этган.

Аукцион ташкилотчилари машина учун 600 минг доллар олишни кутган бўлсалар-да, қўлга киритилган сумма ҳам мўмайгина бўлган. Харидор номи маълум қилинмаган, бироқ шуниси маълумки, олинган маблағлар балоғатга етмаганлар билан ишловчи The Opportunity Network ташкилотига йўналтирилади.