Канадалик эркак ўз гаражида авиадвигателли Ferrari ясади

Канадалик Райан Маккуин ўз гаражида Ferrari Enzo’нинг нусхасини тайёрлаб, унга Rolls-Royce’нинг авиадвигателларини ўрнатди. Жет-карни тайёрлаш учун Маккуин 12 йил вақт ва 90 минг доллар сарфлади. Автомобилга Insanity (“Телбалик”) деб ном берилган.

Маккуин Эдмонтондаги жет-карлар пойгасини томоша қилиб қайтганидан сўнг, 2004 йилда лойиҳани ишлаб чиққан. У ўзининг Chevrolet Corvette’ини сотиб, тушган пулга давлат аукционида иккита реактив двигатель сотиб олган.

Маккуиннинг сўзларига кўра, у лойиҳани амалга оширишга киришган вақти муҳандислик иши ҳақида ҳеч қандай тасаввурга эга бўлмаган ва ҳатто чилангарлик қурилмасидан фойдаланишни ҳам билмасди. У Enzo услубидаги кузовни тайёрлаш учун икки йил, металл конструкцияни тайёрлаш учун эса беш йил вақт кетказган.

“Телбалик”нинг оғирлиги 1723 килограмм ва соатига 650 километр тезлик билан ҳаракатлана олади. Машина икки дақиқада 400 литр авиакеросин сарфлайди. У ҳар қандай оммавий тадбирларда қатнашиши мумкин, бироқ умумий фойдаланувдаги йўлларда юрмайди — Маккуин ўз жет-карини трейлерда олиб юради.