Карл Бенц ясаган биринчи автомобиль

1885 йилнинг январ ойи охирларида ихтирочи Карл Бенц ясаган автомобиль уч ғилдиракли, икки кишига мўлжалланган ўриндиқлари бор эди. Велосипедсимон бу автомобилга тўрт тактли бензинли мотор ўрнатилган бўлиб, атиги 0,9 от кучига эга бўлган. Мотор сув орқали совутилган. Катта-катта орқа ғилдираклар ўқи устида цилиндр жойлашган. У ҳаракатни битта тасма ва иккита занжир воситасида узатган. Маховик горизонтал вазиятдаги катта чамбарак шаклида бўлиб, у двигатель остида эди. У тирсакли валга уланиб, двигателни ўт олдириш ва текис ишлаши учун хизмат қилган.

Электрли ўт олдириш учун гальваник батарея ишлатилган. Даймлернинг ёғоч аравасидан фарқли равишда мазкур автомобилнинг металл қувурлардан ишланган рамаси бор эди. Мутахассисларнинг фикрича, Бенцнинг уч ғилдиракли машинаси Даймлер ихтиросининг такомиллаштирилган кўринишидир.

1886 йилнинг 29 январи тарихда биринчи марта бензинли автомобиль пайдо бўлган кун ҳисобланади. Чунки айнан шу куни Бенц ўз машинасига №37435 рақамли патент олган. Шунга қарамасдан асрнинг зўр ихтироларидан бири саналган автомобилнинг савдоси Германия ва Франция бозорларида дарҳол қизиб кетмаган. 1893 йилгача 15га яқин автомобиль нусхаси ишлаб чиқариб патентланган холос.