Кекса Porsche 911нинг янги қиёфаси энди сир эмас

Нидерландиянинг Autoblog сайти 1967 йилда ишлаб чиқарилган Porsche 911 пойга купесининг 50 ёшга кириши муносабати билан ишлаб чиқилган махсус спорткар фотосуратларини эълон қилди. Икки эшикли автомобиль намойиши Женева автосалонида бўлиб ўтади.

Янги Porsche 911 R модели 911 GT3 пойга суперкарининг 3,8 литр ҳажмли атмосферали моторига эга бўлади. Олти цилиндрли двигателнинг қуввати 475 от кучига тенг. Шу билан биргаликда, “юбилей” купеси олти диапазонли механик тезлик узатмалар қутиси ҳамда GT талқинига ўрнатиладиган етти босқичли “робот” билан биргаликда ҳаракатланади.

Porsche 911 R модели 911 GT3 суперкарига қараганда енгилроқ бўлиши кутилмоқда. Шунингдек, янги автомобилга антиқанот ўрнатилмаслиги мумкин. Орқа диффузори ҳам ўзгача бўлиши айтилмоқда.

Норасмий маълумотларга кўра, купенинг адади 600-800 дона атрофида бўлади. Уларнинг ҳар бири энг камида 160 минг евродан сотилади. Бироқ айни пайтгача барча “юбилей” спорткарлари сотиб бўлинган.