Келаси йилдан бошлаб Ўзбекистонга электромобилларни божсиз олиб кириш мумкин

Шавкат Мирзиёев “Ташқи иқтисодий фаолиятни ва божхона-тариф тизимини янада такомиллаштириш тўғрисида” ги қарорни имзолади. Бу қарор “яшил машиналар”ни мамлакатимизга божсиз олиб киришга имкон беради. Янги йилнинг биринчи январидан бу қарор кучга киради.

Янги қарорга мувофиқ, 2019 йилнинг 1 январидан бошлаб Ўзбекистонга олиб келинаётган 700дан ортиқ маҳсулотлар учун янги бож ставкалари камайтирилган.

Фақат электр қуввати билан ҳаракатланадиган транспорт воситалари учун бож ставкаси ноль миқдорда белгиланган. Янги божхона ставкаларини муҳокама қилиш вақтида электромобиллар учун 10 фоиз ставка қўйиш таклиф қилинган эди, лекин якуний ҳужжатда бу таклиф инобатга олинмаган, деб ёзади sof.uz.

Сўнгги вақтда Ўзбекистонда экологик транспорт ишлаб чиқаришга оид лойиҳалар жонланганлигини кузатиш мумкин.

Май ойининг охирида Тошкентдаги Турин политехника университетининг талабалари электромобиль ишлаб чиқаришига ихтисослашган гуруҳ тузилди.

Бундан ташқари, Фарғона водийсида Хитойнинг Changan Automobile Group компанияси электромобилсозлик заводини қурмоқчи. Корхонага 15-20 млн доллар сармоя киритилади ва 100-150 иш жойи яратилади.