Кофе ичинг – автобус узоқ юради

20 ноябрдан Лондон кўчаларида кофе қуйқасига ҳаракатланувчи автобуслар қатнай бошлайди, деб ёзмоқда ВВС. Аниқроғи, кофе қолдиғини дизелга аралаштириб ёнилғи тайёрланади. Бу иш билан шуғулланувчи bio-bean компаниясининг билдиришича, ҳозир бир автобус йил бўйи қатнашига етарли миқдорда кофедизель тайёрланган.

Лондонликлар бир йилда ичган кофедан 200 минг тоннага яқин қуйқум қолади. Қайта ишловчи компания кафелардан кофе қуйқумини йиғади ва ундан кофе ёғи чиқариб олади. Бу эса биоёнилғи тайёрлашда зарурий хом ашёдир.

Битта автобусни бир йил давомида мазкур биоёнилғи билан таъминлаш учун 2,5 млн кружка кофе ичилиши лозим.

Автобусни кофедизель ёқишга мослаштириш учун бирор-бир ўзгартириш киритишнинг ҳожати йўқ.

Эслатиб ўтамиз: Лондон транспорт тизими ноанъанавий ёнилғига биринчи марта иши тушаётгани йўқ. Сентябр ойида британияликлар шаҳар канализациясидан 130 тоннали ёғли қуйқа топиб, уни ҳам транспорт ёнилғиси сифатида ишлатишни режалаштирган.