Конвертоплан сиртига тушувчи қуёш энергиясидан қувват олиб ишлайди (видео)

Американинг XTI Aircraft компанияси йўловчи ташийдиган TriFan 600 конвертопланига гибрид двигатель ўрнатмоқчи

Конвертоплан деб парраклари буриладиган, кўтарилиш ва қўнишда кўтариш-туширишга ҳамда горизонтал учишда тортишга хизмат қиладиган аппаратга айтилади. Самолёт каби қанотлари ёрдамида кўтарилади. Конструкцияси тик кўтарилувчи ва қўнувчи самолётники кабидир. TriFan 600нинг олд қисмида (қанотларида) иккита думида битта парраги бор. Қанотларидаги парраклар бурилади, орқадагиси бурилмайди.

TriFan 600 бизнес-авиация соҳасидаги биринчи конвертопландир. 12 нафар йўловчини олиб 10 км баландликда 2800 кмдан ортиқ масофага учиши мумкин. Конвертоплан вертолёт қўниш майдончасига ёки умуман лозим топган жойга қўниши мумкин.

Энди ушбу конвертопланга электрли мотор ўрнатиш режалаштириляпти. Унда аккумулятор ҳамда генераторли газ-турбина двигатели бўлади. Энергия ишлаб чиқариш учун генератордан ташқари конвертопланнинг юқори қисмига қопланган юпқа плёнкали қуёш батареялари ишлайди. 4 кВтли қуёш батареяларининг энергияси аппарат ердан кўтарилиши учун сарфланади.

Гибрид агрегатдан фойдаланиш аппарат ва ундан фойдаланиш нархини анчагина камайтиради. TriFan 600 замонавий маъмурий самолётларга қараганда анчагина кам ёнилғи сарфлайди. Конвертопланнинг биринчи прототипи келаси йили тайёр бўлади ва ҳавода синаш бошланади.