Lexus: Бир миллионта IS моделлари сотилди

Lexus компанияси IS сериясидаги илк автомобиль намойиш этилганидан 17 йил ўтиб, мазкур серия моделларининг сотуви 1 млн донани ташкил этганини маълум қилган.

Миллионинчи автомобиль июль ойининг охирида конвейердан чиққан. Модель 1999 йилда яратилган ҳамда Европа учун махсус ишлаб чиқилган илк  Lexus бўлган. Автомобиль ўшанда BMW 3-Series ва Mercedes-Benz C-Class седанлари билан бозорда рақобатга киришган.

Аввалроқ машинага 2,0 литрли 6 та цилиндрга эга қаторли двигатель ўрнатилган бўлиб, у 150 та от кучи билан ҳаракатланган. Кейинчалик моторлар қаторига 3,0 литрли агрегат қўшилган. Шундан сўнг компания бренднинг немис бозоридаги позициясини мустаҳкамлаган ўзининг ягона универсали — IS SportCross моделини тақдим этди. Энг қизиғи, хромланган корпусдаги қимматбаҳо тошларни эслатувчи орқа фаралар ушбу марканинг энг аҳамиятли қисмига айланган. Фаралар тюнинг ишқибозлари орасида яхши оммалашган, бундан ташқари, бошқа ишлаб чиқарувчилар ҳам уларнинг дизайнидан кенг фойдаланишган.

Сериянинг иккинчи авлоди 2004 йилда тайёрланган, айнан мана шу йил баъзи мамлакатлар автомобиль бозорида дизелда ҳаракатланадиган Lexus ҳам пайдо бўлган. Шу билан бирга,  IS сериясида максимум 270 км/ст тезлик билан ҳаракатланадиган IS F ва V8 маркалари ҳамда купе-кабриолет ҳам жой олган. Автомобилнинг учинчи авлоди 2013 йилдан бошлаб ишлаб чиқарилмоқда. Айни вақтда Lexus жаҳоннинг 70 та мамлакатида ойига 6000 дона IS туркумидаги автомобилларни сотмоқда. Агар компания мана шундай суръатда одимласа, ишлаб чиқарувчининг сўзларига қараганда, иккинчи миллионнинг сотилишига яна 14 йил зарур бўларкан.