Лондонда Хитойнинг ўта камчиқим автомобиллари кира қилади

Лондон мэрининг буйруғига биноан шу йилнинг 1 январидан бошлаб пойтахтда электромобиль ёки электр ёрдамида камида 48 км юра оладиган гибрид машиналар такси хизмати кўрсатиши керак.

LEVC TX таксомотори бу талабга жавоб беради, унинг машиналари электрнинг ўзи билан 112 км йўл юради. Батарея ўтирса, 1,3 литрли бензинли мотор хизматга шай.

Лондон таксисини оддий розеткадан 8 соатда, тез зарядлаш станциясидан 20 дақиқада 80 фоизга зарядлаб олса бўлади.

Айтиб ўтиш керакки, 2010 йилда Хитойнинг Geely компанияси London Taxi Company (LTC) транспорт ширкатини сотиб олган ва номини LEVC деб ўзгартирган. Хитойнинг ёрдами билан бутунлай янги LEVC TX русуми ишлаб чиқилди.

 Машинанинг кузови азалий Лондон кэблариникидан бўлиб, алюминий панелдан ишланган. Албатта, у кўп қулайликларга эга, бироқ энг асосий хусусияти эксплуатациясининг арзонлигидир. Агар илгари лондонлик киракаш бир ҳафтада ёнилғига ўртача 150 фунт стерлинг сарфласа, янги таксига ўтирган ҳайдовчининг ҳафталик харажати 50 фунт стерлингдан ошмайди. Ҳамда беш йилга қадар ҳафтасига 177 фунтдан (250 доллар) тўлаб туради, беш йиллик лизинг шарти шунақа.

LEVC фирмасига эса буюртмалар сони кўпаймоқда. Компания 2020 йилгача 9 мингта гибрид такси ишлаб чиқармоқчи.