Малика Диананинг кабриолети кимошдига қўйилади

ХХ асрнинг энг таниқли аёлларидан бирига тегишли бўлган Audi Cabriolet автомобили Silverstone Auctions кимошди савдосига қўйилади.

Автомобиль 1994 йилда ишлаб чиқарилган. Жами 21 412 миль (34 459 км) йўл босган. Олдиндан 50 000-60 000 фунт-стерлингга (тахминан 55 500-66 600 евро) баҳоланмоқда.

Кабриолет Audi 80 русумининг очиқ версиясидир. Ранги кўкиш тусда. 2,3 литрли, 133 от кучига эга бўлган беш цилиндрли двигатель ўрнатилган. Салонига оқ рангли Parchment чарми қопланган.

Малика ихтиёрида бўлган даврида 4000 миль (6437 км) йўл босган, сўнг бир телебошловчи харид қилган. У ҳам машинадан деярли фойдаланмасдан 2013 йилда бошқасига сотган.

Савдо ташкилотчилари автомобиль бекаму кўст ҳолда сақланганини айтмоқда. Маликанинг “Ауди”си 12 ноябр куни кимошдида сотилади.

Малика Диана 1961 йилда таваллуд топган. У 1981 йилда шаҳзода Чарлз билан турмуш қурган ҳамда Уилям ва Гарри исмли фарзандлар кўрган. 1997 йилнинг 31 августида Париждаги автоҳалокатда дунёдан кўз юмган.