Manta Ray – ракета тумшуқли автомобиль

1951 йилда калифорниялик икки ёш авиасоз инженер Глен Хайер ва Вернон Антуан янги Studebaker Commander сотиб олиб ўзларининг тасаввуридаги концепт-кар тайёрлашга киришди. Қайта ишланган тумшуқдор автомобиль бирдан дунёга машҳур бўлиб кетди.

Кўриб турганингиздек, “Студебеккер”нинг, асосан, ташқи кўриниши ўзгарган. Шишапластикдан ишланган кузови самолёт фюзеляжига ўхшайди, ракетаникидек тумшуғи эса авиацион двигателни эслатади. Ҳа, кастомайзерларнинг авиасозлиги ўзини намоён қилганди. Аммо Studebakerнинг 3800 см кубли V8 двигатели қолдирилди.

1953 йилда Manta Ray деб номланган концепт гараждан чиқдию, барчанинг эътиборини тортди. Машина Лос-Анжелес автошоусида намойиш этилди, муаллифлари махсус совринларга сазовор бўлди. Машинани эса йирик автомобиль дилерлик тармоғи эгаси сотиб олди. Харид туфайли машина янаям танилди, у ҳақда турли журналлар ёзди.

1959 йилда донгдор машина Пинатс Лейсер исмли кишига сотилди ва Manta Ray унинг гаражида… 2014 йилга қадар ётди. Одамлар уни аллақачон йўқолдига чиқаришганди. Пинатс 1990 йилда дунёдан ўтган, унинг беваси эса 120 автомобилдан иборат коллекциясини бир чеккадан сота бошлаганди. Аммо ўғлининг илтимосига кўра мақоламиз қаҳрамонини сотмади.

Икки йил муқаддам коллекционернинг ўғли автомобилни оммага кўрсатди ва шоуларга олиб борди. Машина яхши сақланган, деярли асл комплектациясини сақлаб қолган, яхши юрар эди. Шундай қилиб, Manta Rayнинг узоқ йиллик узлатдан кейинги янги умри бошланди.