Mazda’нинг янги кроссовери тафсилотлари маълум бўлди

Интернетда Mazda’нинг CX-4 деб номланувчи янги кроссовери ҳақидаги тафсилотлар пайдо бўлди. Апрель охирида Пекиндаги автосалонда тақдимоти бўлиб ўтадиган моделнинг кўрсаткичлари Хитойнинг Auto.163.com сайтида чоп этилди.

CX-4’нинг габарит узунлиги 4633 миллиметр, эни 1840 миллиметр, баландлиги эса 1535 миллиметрни ташкил қилади. Ғилдираклар базаси 2700 миллиметрга тенг. Шу тариқа, янги йўлтанламас CX-5’дан 78 мм узунроқ ва 175 мм пастроқ бўлади. Шу билан бирга моделларнинг ғилдираклар базаси бир хил ўлчамда бўлади.

Янги машина учун 2,0 ва 2,5 литрли иккита двигатель таклиф қилинади. Биринчи двигателнинг қуввати 157 от кучини, иккинчисиники эса 191 от кучини ташкил қилади. Иккала мотор ҳам 6 поғонали автоматик узатмалар қутиси билан жуфтликда ишлайди. Модель тўлиқ приводли бўлади.

Сайтда аниқлашларича, йўлтанламаснинг 2,0 литрли двигеталга эга версияси учун 17 дюймли, 2,5 литрли двигателлиси учун 19 дюймли ғилдираклар диски таклиф қилинади.

Mazda компанияси CX-4’нинг биринчи тизерини март ўртасида чоп этганди. Ўшанда компания модель «SkyActive технологиясининг тўлиқ тўпламини» олишини таъкидлаб ўтганди. Кейинроқ япон компанияси янги кроссоверини фақатгина Хитойда ишлаб чиқариб, шу ернинг ўзида сотиши маълум бўлганди.

Манба: Kun.uz