McLaren 570S спорткарини ишлаб чиқара бошлади

Макларен компанияси 570S спортчилар купесини серияли ишлаб чиқаришга киришди. Машинани йиғиш Уокинг (Англия) заводида йўлга қўйилди. Автомобиль McLaren Sport Series оиласининг биринчи модели ҳисобланади ва янги MonoCell II платформасида яратилган.

Конструкциясида алюминий ва углерод толаси кўп ишлатилгани ҳисобига 570S жуда енгил автомобиль бўлиб чиқди, унинг вазни 1313 кг. 3,8 литрли V8 турбодвигатель 570 от кучига эга. Агрегат етти поғонали SSG узатмалар қутиси билан ишлайди. 100 км/соат тезликка 3,2 сонияда эришади.

Яқин йилларда компания Sport Series оиласидан яна бир 540C спорткарини ишлаб чиқаришни мўлжалламоқда. У компаниянинг энг ҳамёнбоп автомобилларидан бўлиши кутиляпти. Дизайни 570S спорткарига ўхшайди. Янгича аэродинамик тўсиғи, енгил материаллардан ясалган 18 ва 19 дюймли ғилдирак дисклари бўлади. Купе салонига чарм сирилган, спортчиларбоп ўриндиқлар ва 7 дюймли дисплейга эга ахборот-кўнгилочар тизими мавжуд. 540Cнинг 3,8 литрли бензинли V8 турбомотори бўлади. Қуввати 540 от кучига эга, айланиш моменти 540 Н·м. 100 км/соат тезликка чиқиши учун 3,5 сония кифоя. Энг юқори тезлиги эса 320 км/соат бўлади.