Mercedes янги авлод G-Class автомобилларини синашни бошлади

Mercedes-Benz компанияси янги авлод G-Class йўлтанламасларини йўлларда синашни бошлади. Синовдан ўтказилаётган прототипнинг илк суратлари Motor1 нашри томонидан эълон қилинди.

Аввалроқ G-Class жорий W463 индексини сақлаб қолиши ҳақида хабар берилган эди. Айни вақтда, “Мерседес” вакилларининг қайд этишича, модернизация шу қадар сезиларли бўладики, йўлтанламасни мутлақо янги автомобиль деб атаса ҳам бўлади.

Суратларда “мул” акс этган — янги автомобилнинг агрегатлари ҳозирги моделнинг чалғитувчи рангларга бўялган кузови остида яширинган. Шу билан бирга, прототипнинг ғилдирак изи нисбатан кенгроқ эканини сезиш мумкин — тахминларга кўра, у тақрибан 10 сантиметрга катталашади.

Аввал хабар берилганидек, модель конструкциясида алюминийдан кўп миқдорда фойдаланилгани сабаб, унинг вазни 200 килограммга енгиллашган. Бундан ташқари, G-Class янги кўп босқичли олд осма ва гидрокучайтиргич ўрнини эгаллайдиган электромеханик руль бошқаруви кучайтиргичи билан таъминланади.

Йўлтанламас янги, ҳажми уч литр, цилиндрлари сони олтита бўлган дизелли ва бензилли моторлар билан таклиф қилинади. Дизель двигателларнинг қуввати 300 от кучига тенг бўлса, бензинли мотор 360 от кучи беради. Моторлар тўққиз босқичли автомат тезлик узатмалар қутиси билан ҳамоҳангликда ишлайди.

Янги Mercedes-Benz G-Class 2017 йилнинг охирида пайдо бўлиши кутилмоқда.