“Мерседес” 408 от кучига эга электрокроссоверни намойиш этди

Mercedes-Benz компанияси Париж автосалонига 408 от кучига эга Generation EQ электрокроссовери концептини олиб келди. Прототипнинг 2019 йилдан бошлаб сериялаб ишлаб чиқариладиган версияси Tesla Model X’га, шунингдек, Audi, Porsche ва Jaguar’нинг электр двигателли йўлтанламаслари билан рақобатлаша олади.

Mercedes-Benz Generation EQ олд ва орқа ўқларда биттадан — жами иккита электромотор билан таъминланган. Двигателларнинг биргаликдаги қуввати 300 киловатт (408 от кучига тенг). Кроссовер беш сония бўлар-бўлмас соатига 100 километрлик тезликка эриша олади.

Двигателлар сиғими 70 киловатт-соатли литий-ионли аккумляторлар тўпламидан қувват олади, у бир марта қувватлантирилганидан сўнг 500 километргача йўл босиш имконини беради. Прототип батареяларни қувватлантиришнинг инновацион тизимига эга: автомобиль беш дақиқада яна 100 километр йўл юришга етадиган қувват йиға олади.

Электрокарда ойна-тозалагичлар ва эшик тутқичлари йўқ, анъанавий ташқи кўзгулар эса орқани кўрсатувчи камералар билан алмаштирилган. Бундан ташқари, прототипга катта панорамали том ва ўзига хос аэродинамик шаклга эга 21 дюймли ғилдирак дисклари ўрнатилган.

Mercedes-Benz Generation EQ’нинг салонига ёруғлик диодли ёритгичлар, диагонали 21 дюйм бўлган тўлиқ рақамли ускуналар панели, шунингдек, сенсорли иккита OLED-панели бор кўп функцияли руль чамбараги ўрнатилган. Орқани кўрсатиш камералари орқали олинган тасвирлар олд эшикларга қотирилган қўшима мониторлар орқали кўрсатилади.

Прототип BMW, Audi ва Daimler компаниялари Nokia’дан сотиб олган HERE харита сервиси базасидаги янги навигацион тизим билан таъминланган. “Ақлли” навигатор маълумотларидан фойдаланган ҳолда кроссовер электроникаси ҳаракатланишнинг оптимал тезлигини ўрнатиши, шунингдек, шасси созламаларини ўзгартириши мумкин.

Концепт-карнинг серияли версияси EQ суббренди остида чиқарилади. Мазкур бренд орқали Mercedes-Benz ўзининг барча электрокарларини сотишни режалаштирмоқда. Янги автомобиллар оиласи камида тўртта модель — икки седан ва икки йўлтанланмасдан иборат бўлади.