Москва автосалони: XCODE ва Ладанинг бошқа моделлари

Шу ҳафтада старт берилган Москва автосалонида Россиянинг Lada компанияси бир нечта янги ва рестайлинг этилган моделларни тақдим қилди. Кўргазмадаги моделларга қараб, янги бош директор қўл остида компания қандай йўналишда кетмоқчи эканлигини англаш мушкул эмас.

Компания ушбу автосалонда 6 та автомобиль концептини намойиш этди. Улар ичидан Лада Веста Кросс ва XRAY Кросс ўз ўтмишдошларидан кучайтирилган клиренс (Вестада у 203 мм) ва кузов периметри бўйлаб жойланган тўсгич билан ажралиб туради. Янги XRAY фақат кроссовер форм-факторида 5 эшикли қилиб тайёрланса, Веста Кросснинг универсал типдаги кузовидан ташқари яна седан версияси ҳам ишлаб чиқарилади.

Лада кроссоверларни кейинги йилнинг сўнгида тайёрлашни режалаштирган. Янги XRAY эса 2018 йилда сотувга чиқарилади. Ушбу автомобиллар аввалда олд узатмали тизимга эга бўлади. Айни вақтда компания Веста ва XRAY учун тўлиқ узатмали трансмиссияни қидириш билан машғул. Айтишларича, Renault-Nissan тизимлари Лада автомобиллари учун танланиши эҳтимолдан холи эмас. Орқа ғилдиракларни тортувчи гидромотор Sandero хэтчбекларида синовдан ўтган, бироқ тизим Renault моторларида самаралироқ ишлайди. Албатта, ушбу моторлар Лада автомобиллари учун мослаштирилади.

Веста ва XRAY автомобилларининг спорт версияси ҳам тайёрланиб, уларни кейинги йилдаёқ харид қилиш мумкин бўлади. Спорт версиядаги Вестанинг подвескаси кучайтирилди, дискли орқа тормозлар билан таъминланди, JR5  механизмида ишлайдиган моторнинг ҳажми эса 1.8 литрга оширилиб, 150 от кучига эга бўлди. XRAY Спорт ҳам Веста Спортдан кўп фарқ қилмай, бир қанча янги функцияларни ўз ичига олади. Веста Спортнинг нархи тахминан миллион рубль атрофида бўлиши айтилмоқда.

Шу билан бирга компания 1.8 литрли, 122 от кучидаги оддий Весталарни ҳам яратиш мақсадида, ҳамда тез орада Signature туркумидаги узайтирилган седанларнинг савдосини ҳам бошламоқчи.

Лада президенти Николя Мор компания 2025 йилгача жами 8 та янги автомобилни тайёрлаб, яна шунча мавжуд моделларни рестайлинг қилиши тўғрисида баёнот берган. Бу тўғрисида аввалроқ сайтимизда хабар берган эдик.

Энди Ладанинг Москва автосалонида тақдим этган энг асосий модели ҳақида гапирсак.

Lada XCODE, шубҳасиз, автосалоннинг энг муҳим экспонатига айланди. Модель ҳақида автосалонгача жуда кўп материаллар матбуотда пайдо бўлган эди. Биз ҳам сайтимизда мазкур концепт янгиликларини ёритиб борган эдик. Ушбу концепт кроссовер сезиларли даражада ихчам, деталларнинг уйғунлиги яхши бажарилган.

Мазкур модель компаниянинг Москва автосалонида намойиш этилган бошқа Х сериясидаги моделлардан ўзгача дизайни билан ажралиб туради. Бу автомобиль АвтоВАЗнинг Москва дизайн студиясини бошқараётган Рафаэль Линарининг Лададаги илк ижод маҳсули. У аввалроқ Renault Twingo хэтчбеки устида иш олиб борган.

Концепт-кар бир неча ой давомида Россиянинг Тольятти шаҳрида ишлаб чиқилган. XCODE ҳажман XRAY моделидан кичикроқ, узунлиги бўйича Калинага деярли яқин (4 метр). Компания ҳозирда ўз автомобилларини замонавий ахборот технологиялари билан интеграциялаш ва турли гаджетларга қизиқадиган ёшларнинг дидига мос машиналарни яратишни ўйламоқда. Шу мақсадда XCODE янги, интернетга уланадиган Lada Connect номли мультимедиа тизими билан таъминланади. Шу билан бирга модель автопаркинг, круиз-назорат ва дистанцион бошқарув тизимига эга бўлади.

Лада аввалроқ Калина-2 версиясида ҳам такомиллашган мультимедиага урғу берганди. Бироқ модель анъанавий шаҳар хэтчбеклари сегментида корхонанинг режаларини чиппакка чиқарди (ушбу моделдан шу йилнинг илк 5 ойида 2044 дона сотилган). Харидорлар кўпроқ универсал моделлар (юк-йўловчи ташишга мўлжалланган Калина вариантидан 4000 дона атрофида сотилган) ёки псевдокроссоверларни (Калина Кроссга 3723 та буюртма берилган) танлашган.

Мазкур ҳолатлардан хулоса чиқарган ҳолда компания XCODE кроссоверини ишлаб чиқаришга қарор қилган. Тўғри, автомобиль ҳали лойиҳа босқичида бўлса-да, кўпчилик унинг 2019 йилда сотувга чиқарилишини башорат қилмоқда.