Нима сабабдан “Жигули” “Лада” деб аталади?

“Жигули” собиқ иттифоқнинг энг машҳур автомобилларидан бири. АвтоВАЗ маълумотига кўра ВАЗ-2101, ВАЗ-2102, ВАЗ-2103, ВАЗ-2106 русумлари ортидан такомиллаштирилган ВАЗ-2104, ВАЗ-2105, ВАЗ-2107 русумлари ҳам харидорини топган. Европа бозорига чиққанида эса “Жигули” номини ўзгартиришга тўғри келган эди.

Бунинг сабаби “жигули” сўзи инглизча gigolo билан оҳангдошлигида. Бу сўз Европа халқларида “рақс тушиш ва бошқа хизматлар учун аёлларга ёлланадиган енгилтабиат эркак” маъносини билдиради. Шундай қилиб, экспорт моделлари Lada-1200, Lada-1300, Lada-1500, Lada-1600 номларига ўзгарган (сонлар двигатель ҳажмини англатади). 1990 йилдан АвтоВАЗ “Жигули” номини олиб ташлаган.