Nissan компанияси Pathfinder’нинг қувватини оширди

Nissan компанияси янгиланган Pathfinder кроссоверини тақдим этди. Машинанинг рестайлинг қилинган версияси ўзгарган олд томонга эга бўлди, ҳажми 3,5 литрга тенг бензинли моторининг қуввати эса оширилди.

Олти цилиндрли мотор 284 от кучига эга. Рестайлинггача бўлган версия моторининг қуввати “атиги” 260 от кучига эга эди. Бундан ташқари, олд ва орқа амортизаторларнинг бикирлиги ўзгарди, машинанинг бурилиши яхшиланди.

Ташқи томондан янгиланган Pathfinder эскисидан радиатор панжараси, олд бампер ва орқа чироқлар оптикаси билан фарқланади. Салон дизайни ўзгармаган.

Янгиликлар қаторида орқа бампер остида оёқни қимирлатиш билан очиладиган юкхона эшиги ва янги мультимедиа тизимини таъкидлаб ўтиш мумкин.

2017 йилги модель қаторидан ўрин олган янги Nissan Pathfinder’нинг нархи ҳозирча эълон қилингани йўқ. Рестайлинггача бўлган кроссовер АҚШда ҳозирча 29,83 минг доллардан сотилмоқда.