Nissan Leaf электрокарининг қувват захираси чорак баробар кўпайди
Nissan компанияси 2016 йилги моделлар қаторидан ўрин олган Leaf электрокарини намойиш этди. Моделнинг аккумляторлар блоки сиғими нисбатан катталашган бўлиб, компания вакилларининг сўзларига кўра, хэтчбекнинг қувват захираси 25 фоизга ошган.
Аккумляторлар тўпламининг сиғими 24 киловатт-соатдан 30 киловатт соатгача ошган, ўз навбатида автомобиль эса 21 килограммга оғирлашган, бироқ ҳажми ўзгармаган. Янги батареялар ёрдамида машина, бир марта тўлиқ қувватлантирилганидан сўнг, 250 километр масофани босиб ўтиши мумкин — эски батареялар қуввати фақат 199 километрга етарди.
Янгиланган Leaf’нинг савдолари Буюк Британияда 2015 йил декабридан бошланади. Қувват захираси ошган автомобилнинг нархи 24,49 минг фунт-стерлинг (33,7 минг евро)дан бошланади — бу эски модель нархи нисбатан 1,6 минг фунт (2,2 минг евро)га қиммат.
Аввалроқ кейинги авлод Nissan Leaf автомобилининг энг қиммат варианти бир марта тўлиқ қувватлантирилганидан сўнг 400 километр масофани босиб ўта олиши ҳақида хабар берилган эди. Японлар электрокарнинг нархи, босиб ўта оладиган масофаси ва динамикаси бўйича фарқ қиладиган бир неча модификацияларини ишлаб чиқиш ниятида.