Олмонлар Smart’ни олти ғилдиракли лимузинга айлантирди
Сентябрь ўрталарида Франкфуртда бўладиган моторшоуда Германиянинг Limouzine.de фирмаси томонидан Smart ForTwo негизида тайёрланган олти ғилдиракли лимузин дебюти бўлиб ўтади. Madeforsix номини олган янги машина олти кишини — бир ҳайдовчи ва беш йўловчини сиғдира олади.
«Смарт»нинг габарит узунлиги 2,69 метрдан 5,5 метргача узайган. Конструктор моделга орқа томондан учинчи ўқ, йўловчиларнинг салонга кира олиши учун ўртадан тепага очилувчи эшик ва 18 дюймли ғилдирак дискларини қўшган.
Лимузин салони қора ва оқ чарм билан безакланган. Йўловчилар қисмида қадаҳлар ва шампан шишаси учун жойлар, хос совитиш тизими, иккита LED-телевизор, DVD’ли мультимедиа тизими, Bluetooth орқали уланиш мумкин бўлган GoPro камераси, музлатгич бор.
Техник томонидан ҳозирча фақатгина бир нарса — автомобиль 120 от кучига эга двигатель билан ҳаракатга келтирилиши маълум, холос.
Олти ғилдиракли «Смарт»нинг бошқа тафсилотлари Франкфурт автосалони давомида маълум қилинади.