Ўтмишнинг балиқсимон концепти кимошдида сотилади

Chrysler буюртмасига мувофиқ ясалган Streamline X Gilda номли ғаройиб концепт Американинг Barret-Jackson кимошди савдосига қўйилди.

Streamline Xнинг дебюти 1955 йилда Турин шаҳрида бўлган. Аммо премьераси ўтиши биланоқ дарров унутилган. Концепт аввал Генри Форд музейига, сўнг эса шахсий коллекционер ихтиёрига ўтган. Қизиғи шундаки, оммага кўрсатилганига ярим асрдан кўп вақт бўлган автомобиль бирор марта йўл юрмаган. Чунки мотори йўқ эди.

Gilda аввалига газ турбинали двигателга мўлжалланган. Аммо унга яқиндагина 70 от кучига эга двигатель қўйилди.

Балиқсимон машина кузови алюминийдан ясалган. Аэродинамик қувурдаги синов ва компютерда моделлаштириш унинг 160 км/соат тезликда ҳаракатлана олишини кўрсатди.