Ўзбекистон 24 дона замонавий локомотив харид қилади

Ўзбекистон яқин тўрт йил мобайнида хорижда ишлаб чиқарилган 24 та замонавий локомотив харид қилади, деб хабар қилмоқда Kun.uz Sputnik интернет нашри манбасига таянган ҳолда.

Унинг сўзларига кўра, ушбу ташаббусни Давлат раҳбари маъқуллаган. Ҳозирда, «Ўзбекистон темир йўллари»га хариднинг техник-иқтисодий асосларини ишлаб чиқиш топширилган.

Компания режаларига кўра, хориждан сотиб олинадиган локомотивларнинг 16таси юк ташиш, 8таси йўловчи ташишга мўлжалланган бўлади. Натижада, экспертларнинг фикрича, 2020 йилга келиб, компания йўловчи ва юк ташиш ҳажмини 1,2 мартага оширади.

Янги техникаларнинг барчаси электр энергиясида ишлайди. Бу эса ўзбек темир йўлларини бутунлай электрлаштириш билан боғлиқ. Хусусан, келаси 4 йил мобайнида Самарқанд-Бухоро, Қарши-Термиз, Поп-Қўқон-Марғилон-Андижон темир йўлларини электрлаштириш ишлари поёнига етказилади.

«Ўзбекистон темир йўллари» АЖ раҳбарияти Хитойнинг CNTIC-CNRDLRC компаниясидан катта миқдорда темир йўл техникасини харид қилишни режалаштираётгани ҳақида маълум қилган эди. Айни компания Ўзбекистон шароитларига мослаштирилган O’zel русумли локомотивларини етказиб берган.

Бугунги кунда, мамлакат темир йўл техникаси паркида 50 та замонавий электровоз мавжуд. 2016 йил охирига келиб, замонавий локомотивлар сони 70 фоизни ташкил этиши кутилмоқда.